Në këtë ngjarje të organizuar nga Drejtoria e Akreditimit të Kosovës në kuadër të MINT, ishin të pranishëm Ministrja në detyrë znj. Rozeta Hajdari, Kryesuesi i Bashkëpunimit në Zyrën e BE-së në Kosovë, z. Johannes STENBAEK Madsen, përfaqësues të Trupave të Vlerësimit të Konformitetit (TVK), vlerësues të jashtëm të akreditimit dhe përfaqësues nga shoqatat e komunitetit të biznesit.
Ministrja në detyrë znj. Rozeta Hajdari, theksoi përkushtimin e Ministrisë së Industrisë, Ndërmarrësisë dhe Tregtisë, për mbështetjen e procesit të akreditimit dhe mbështetjen direkte të NVM-ve, duke qenë moto e këtij viti.
Shefi i Bashkëpunimit në Zyrën e BE-së në Kosovë, z.Johannes Stenbaek Madsen, theksoi rëndësinë e zhvillimit të një kuadri të fuqishëm të akreditimit.
Ndërsa Drejtori i Përgjithshëm i Drejtorisë së Akreditimit të Kosovës (DAK), z. Irfan Lipovica, u shpreh se DAK është duke bashkëpunuar me ekspertë vendor e ndërkombëtar, me qëllim që të përmirësohet shërbimi dhe subjektiviteti ndërkombëtar i procesit të akreditimit.
Përveç fjalimeve, prezantimeve dhe panelit diskutues në temën e akreditimit, u shfaq edhe mesazhi i urimit nga Presidentja e Organizatës Evropiane për Bashkëpunim në Akreditim znj. Maureen Logghe, drejtuar Ministres në detyrë të MINT, znj. Hajdari dhe Drejtorit të Përgjithshëm të DAK, z. Lipovica.
Rëndësia e Akreditimit:
Akreditimi përcakton kompetencën teknike, integritetin dhe paanshmërinë e organizatave që ofrojnë shërbime të vlerësimit të konformitetit si testimi, kalibrimi, certifikimi dhe inspektimi, bazuar në standardet ndërkombëtare. Ky proces është në interes dhe përfitim të publikut.
Me kalimin e viteve, roli i akreditimit është rritur dhe është bërë një instrument tepër i rëndësishëm në legjislacionin ndërkombëtar, për krijimin e një tregu me produkte dhe shërbime të sigurta. Gjithashtu, akreditimi lehtëson eksportin e produkteve dhe shërbimeve, duke pasur një ndikim jetësor në ekonomi.
Skemat e Akreditimit në Kosovë:
Drejtoria e Përgjithshme e Akreditimit e Kosovës (DAK) aktualisht ka ngritur katër skema akreditimi:
• Akreditimi i laboratorëve testues sipas kërkesave të standardit ISO/IEC 17025:2017.
• Akreditimi i trupave inspektues sipas kërkesave të standardit ISO/IEC 17020:2012.
• Akreditimi i laboratorëve mjekësorë sipas kërkesave të standardit ISO 15189:2012.
• Akreditimi i trupave certifikues sipas kërkesave të standardit ISO/IEC 17065:2012.
Progresi në Akreditim në Kosovë:
Numri i Trupave për Vlerësim të Konformitetit (TVK) të akredituara në Kosovë është rritur. Aktualisht janë të akredituara 71 trupa të vlerësimit të konformitetit, përfshirë 51 laboratorë testues dhe 20 trupa inspektues.